حركة الرقابة الشعبية الأولى
  • أخر الأخبار
  • الأكثر قراءة
  • الأكثر تعليق

الدوله الهيكليه
حلمى حمدالله
الدوله الهيكليه

تبدو مصر الأن دوله هيكليه وبامتياز ......هتقول يعنى ايه هيكليه ....اشرحلك يا سيدى
زمان ايام حرب الإستنزاف كانت مصر بتبنى حائط للصواريخ.......ماشى
واسرائيل كانت بتلاحقه وتقوم بالإغاره عليه يوميا لمنع بنائه......جميل
هذا الحائط يتكون من مجموعه من قواعد الصواريخ المنتشره فى مصر كلها وللتغلب على العدو لجأ المصريون لحيله قديمه وهى فى وسط القواعد المبنيه السليمه يعملو كده كام قاعده فشنك ...هيكليه يعنى خشب فى كارتون  يقوم الطيران الإسرائيلى يتلخبط وما يعرفش القواعد السليمه من الفشنك ويضرب لخمه .... عرفت يهنى ايه هيكليه ؟؟؟؟؟؟

بلغه خالتى بمبى يعنى من بره  هلا هلا ..... ومن جوه يعلم الله
وبلغه شبابنا بتوع الفيدو جيمز_ video games_ زى بالظبط الديمو فيرجن_demo version_ يخليك تتفرج على الجيم كويس وتعرف مميزاته لكن ما تلعبش غير مرحله صغيره جدا وباقى الأوبتشنز كلها ديمد_dimmed_  باهته.... رمادى يعنى ومش شغاله ولو عايز تلعب بجد هيبعتك على صفحه الكريدت كارد_credit card_ وادفع بقى يا حلووووووووووو

فهمت يعنى ايه هيكليه؟؟؟؟؟طيب ليه مصر هيكليه ؟؟؟؟؟ا..........اقولك
مصر هيكليه يا سيدى لأنها برده كده مفيش فيها حاجه شغاله كله منظر وبس....
لو  مسكنا اى مجال فى مصر وحبينا نشوفه هنلاقيه بيثبت هذه النظريه خد عندك ...
التعليم مثلا طبعا البلد فيها وزاره تعليم وتربيه كمان فوق البيعه ...وفيها وزاره تعليم عالى.... ومليانه مدارس وجامعات وكليات ومعاهد عاليه وواطيه ومتوسطه.... اشى حكومه واشى خاصه و تجريبيه وتجريديه وتكعيبيه.... ومنها الى مصرى والى اجنبى ماشى زى بلاد بره...وعندنا مدرسيين واداريين وفراشيين  وطلبه واتحاد طلبه ودروس خصوصيه ومجموعات تقويه وسبوره وطباشيرومدرجات وداتا شو وكتب داخليه وكتب خارجيه وكتب منوفيه  وملازم... وملاحق...وامتحانات ولجان وظباط  وثانويه عامه وناس بيغمى عليها كل امتحان .......لكن الواقع ان مفيش تعليم وإن مستوى الخريج فى مصر بقى بينافس مستوى الخريج فى الصومال اللى هيه بقالها 20 سنه من غير لا دوله ولا حكومه ولايحزنون......واصبح التعليم فى مصر كما قال خالد الذكر الباشمهندس طه حسين كالماء والهواء .....وانت ادرى بحاله الميه والهوا فى مصر .....الميه ملوثه زى مانت عارف من الصرف الصحى والصناعى والزراعى اللى بيترمى فى النيل ومن المواطنين اللى بيغسلوا هدومهم وبيرموا حيوانتهم فى الترعه و تقريبا 50% من الشعب بيشرب ميه صرف صحى ....اما عن الهواء فهو زى مانت عارف يحمل اعلى نسبه تلوث فى العالم من الهباب بتاع العربيات ومداخن مصانع السيراميك والأسمنت ...ولو كنت ناسى ....السحابه السوده اكييد هتفكرك
وزى ماهو دا حال الماء والهواء هو دا حال التعليم فى مصر.....
طيب سيبك من التعليم....

لدينا تليفزيون حكومى وقنوات ارضيه... وقنوات محليه... وقنوات متخصصه ...وطوفان من القنوات الفضائيه الى جانب المحروس ... التليفزيون المصرى بقنواته العجيبه ...ودا بقى حاجه فللى  قد الكف ويموت ميه والف ....يصرف بالمليارت ويبعزق بالألوفات ...وفالقنا ومصدعنا برامج طبيخ بايت وعزيزتى حواء.... ومسلسلات مسيله للدموع ...ومسببه للتخلف العقلى... ومذيعات فوق السن تطل علينا بعد المرور على جميع ورش دوكو بولاق والسبتيه ...
ومع ذلك مايعرفش ينقل خبر من الشارع اللى وراهم ...وبيذيع نشرات اخباريه من سيبيريا ويستضيف اهل الكهف للحديث عن العصر الحجرى واهو اى عجين والسلام ...وبالتالى وهو مسبب رئيسى لنشر الجهل والأميه والتخلف عبر برامجه.... التى لا ينافسها فى الإنتشار سوى فليت العسكرى ...

لدينا ايضا صحافه محليه وجرائد قوميه شبه رسميه وصحافه حزبيه وصحافه خاصه وطوفان من المطبوعات اليوميه والإسبوعيه والشهريه  ونقابه للصحفيين يتظاهر على سلالمها المتظاهرون ....ودى اهم فايده ليها ....الا اننا لا يوجد لدينا اى حريه فى تداول او معرفه المعلومات ولا يوجد اى مصدر مسئول فى مصر_ مسئول بالفعل _عن تصريحاته ولا يوجد اى مصدر رسمى للتأكد من اى خبر او معلومه او احصاء بالرغم ان عندنا مركز للمعلومات ودعم اتخاذ القرار تابع لمجلس الوزراء ...وهيئه عامه  للتعبئه العامه والاحصاء وهيئه للمساحه واخيرا وليس اخرا جهاز مركزى للمحاسبات ليس له علاقه بالحسابات ...

ولذلك لايوجد لدينا اعلام او ثقافه من اى نوع وعلى ذكر الثقافه فلدينا ايضا وزاره للثقافه وكأننا فى الستينات ولدينا وزير كان فنان ...فى البقاء فى الوزاره... ولدينا مسارح بتتحرق فى بنى سويف _راجع صفحات الحوادث_ وهيئه عامه لقصور الثقافه  وقصور ثقافه وهى اسم على مسمى ...لأن لديها قصور فى الثقافه وثقافه جماهيريه وثقافه غير جماهيريه ومتاحف لا يعرف عنها المواطن اى شى وتوضع الأثار فيها بنفس  طريقه مخازن شركات الصوامع والمطاحن ...ولدينا لوحات عالميه _بتتسرق_ وأثار كونيه _بتتنهب_وهيئه عامه للكتاب لا تدعمه بأى صوره من الصور  ومعارض سنويه للكتاب _يقابل فيها الريس بلدياته_ ومهرجانات دوليه للسينما غالبا لا تجد اى افلام مصريه لعرضها وتحرص على انفاق ميزانيتها على  استضافه اى نجوم من الصف السابع الأجانب غير مشهورين فى بلدانهم الأصليه ويندهشون حين تأتيهم الدعوه للأقامه _فولبورد__full board_ ويندهشون اكثر حين يصفق لهم الجمهور وهم يتسلمون جوائز عالميه لا يعرفون سببها وغالبا ما يصفق الجمهور لصاحبه الفستان الأقل استخداما للقماش وهذه هى" الثقافه" الوحيده المنتشره فى مصر   .


و تؤمن الحكومات المتتاليه لدينا بأنتهاء عصر الزراعه بعد اكتشاف البخار وان النشاط الزراعى لم يكن ملائما للمصريين الا فى العهد الفرعونى ولذلك بعد هوجه الفدادين الخمسه والخمس فدادين اللى وزعتهم الحكومه فى الستينات  استغلت جميع الأراضى الزراعيه فى ...التجريف لعمل الطوب الأحمر  تمهيدا لدخول الفلاحين عصر النهضه ودخول الأراضى فى كردون المبانى ودا انفع 100 مره للفلاح صاحب الأرض ...وطبعا لدينا وزاره للزراعه تتعاون مع اسرائيل وتجيد استخدام المبيدات المسرطنه وتبيع السماد فى السوق السوداء وتسمح بتحول اللأراضى المستصلحه الى منتجعات للجولف وبحيرات صناعيه فى الوقت الى بتقفل فيه الميه على الأراضى المزروعه رز لأنه بيهدر المياه وتدمن ادخال شباب الخريجين وصغار المزارعين الى السجن عن طريق بنك التنميه والإئتمان الزراعى وهى سياسه عامه للدوله تحد من الفلاحين وتحولهم الى فئات لضمان نزاهه الإنتخابات ...


اما المواصلات فى بلدنا....فلدينا وزاره كبيره للنقل والمواصلات ثم اصبحت للنقل بس وسابت المواصلات فى حالها... وهيئه للنقل العام ...وهيئه للطرق والكبارى...وهيئه للأنفاق... ومترو للأنفاق بيمشى تحت وفوق وسكه حديد هى رقم 3 فى العالم تاريخيا _الله يرحمها انجلترا لما كانت لا تغيب عنها الشمس _ وادارات للمرور بجميع المحافظات والمدن ومع ذلك تعيش جميع مدن مصر فى ازمه مرور دائمه ...وازمه مواصلات طاحنه ...ويحكم الشارع المصرى امبراطوريه الميكروباص وتتفوق القاهره عن باقى المحافظات بظاهره توقف المرور تماما من اجل مواكب المسئولين الرئاسيه والوزاريه العامره ...ولذلك فأن اى مشوار فى مصر اصبح ينطبق عليه ما قاله  الزعيم الخالد عادل امام "مشى 10 دقايق بالأتوبيس نص ساعه "


ولدينا القطاع العام.... الله يرحمه وقطاع اعمال وشركات قابضه واتحاد عام للصناعات واتحاد عام للغرف التجاريه واتحاد للمقاولين وهيئه للتنميه الصناعيه وهيئه لمواصفات الجوده وهيئه للتوحيد القياسى ومصانع مثل المصانع الحربيه اللى عملها عبدالناصروباعها مبارك زى مصنع 66 الحربى و99 الحربى ومصنع الطائرات والذى ينتج حاليا وبنجاح  اجود انواع.... المراوح ....هذا بالإضافه الى الهيئه العربيه للتصنيع الى بدل ما تنتج شاشات رادرا بتنتج  شاشات التليفزون .... الا ان حال الصناعه عندنا هو ان الحكومه كل ماتتزنق تبيع لها كام مصنع على كام شركه وتقولك خصخصه ودا  بقى موضوع يحتاج مؤلفات....وتحول بذلك امهر العمال والأسطوات الى مرتادى المقاهى تحت عنوان المعاش المبكر ... وخد عندك مثلا ...فبعد عجزها عن تطوير عمر افندى باعته للقنبيط المستثمر السعودى والذى تعهد بتحويله الى سى عمر فى اقرب وقت وهذا هو التغيير ....دا بعد طبعا ما رهن مقراته الأثريه وباع اللى ينفع يتباع ورهن اللى ينفع يترهن وزى ما بقولكوا الخصخصه دى عايزلها قاعده تانيه خالص ...


الخلاصه ان فلسفه االصناعه لدينا هى نشر شعار... صنع فى مصر ولكن  بمااننا ماعندناش وقت نصنع من اول وجديد فاحنا يدوب شغالين على  التعبئه والتغليف تمشيا مع سياسه احنا اللى دهنا الهوا دوكو... واحنا اللى خرمنا التعريفه... لكن ماحدش قال  احنا الى عملنا _صنعنا _التعريفه قبل ما نخرمها ...او احنا اللى صنعنا الدوكو الى دهنا بيه الهوا ولذلك يمتلئ السوق المصرى بمنتجات صنعت فى جميع بلدان العالم ومنها من هو ليس عضوا فى  الأمم المتحده من اساسه ... لكن من النادر ان تكون مصر بين هذه الدول...

طيب بلاش الدوله والحكومه خد عندك قطاع الرياضه مثلا .... عندنا نوادى وفرق ومنتخبات ولعيبه ومجلس اعلى للرياضه واتحاد الكوره واتحادات للأنديه واتحادات للعبات وزاهر والمعلم حسن شحاته وميدو احتراف وملاييين بتدفع للعيبه وقنوات رياضيه شغاله شتيمه ليل ونهار ومشجعين وبلطجيه والتراس ومنتخب حاصل على المركز رقم 9 فى العالم واخد كاس افريقيا 3 مرات متتاليه ويفشل دا ئما فى الوصول لكأس العالم ....ليه لأن ماعندناش رياضه من اصله حيث ان المواطن لا يمارس اى نوع من انواع الرياضه الا شد الشيشه فى القهوه وحرق الشماريخ فى المدرجات وهى دى الرياضه الوحيده اللى يعرف يمارسها ....

خد بالك من اللى جايه دى بأه ...عندنا الدستور ولدينا دستور 1923 ودستور 1971 ومحكمه دستوريه عليا تكشف لنا دائما ان معظم القوانين التى تقترحها الحكومه ويقرها البرلمان هى فى اللأساس غير دستوريه ولا علاقه لها بالدستور والفضل يرجع الى الساده الترزيه مبتكرو الموضات القانونيه الحديثه .... وفى مصر غابه من القوانين ....وترسانه هائله من اللوايح حسب الطلب و التى يعجز عن حصرها رجال القضاء انفسهم ولدينا قضاء شامخ... وقضاء جالس ....وقضاء واقف ....وقضاء شرعى ....وقوانين لأى شئ وكل شئ.... قانون مدنى وجنائى ومرافعات وتأمينات ومعاشات وايجارات واحوال شخصيه وخلع  ومحاكم للأسره و محاكم اقتصاديه ومحاكم اداريه ومحاكم كليه ومحاكم جزئيه... لكن ملخص احوال العداله فى مصر هو ماقاله الممثل    احمد راتب     فى فيلم الإرهاب والكباب "30 سنه فى المحاكم مش عارف اخد حقى ويوم مااتهورت وقتلته طلع لى حكم الإعدام فى 6 اشهر" فالعداله فى بلادنا  راكبه سلحفاه على استحياء  .....والقانون لا يطبق بقوه القانون ولكن بقوه المواطن فلو كنت مواطن عادى يطبق عليك القانون 100% اما لو كنت مواطن فايق شويه ومن عينه انت ما تعرفش بتكلم مين  ممكن يبقى 50 % ولو كنت مواطن من الساحل الشمالى فأكيد لا يطبق عليك اى قانون من اصله ....اذ ان هناك خارجون على القانون وهناك خارجون من تطبيق القانون وبعد دا كله يحدثك  الجميع عن نزاهه وعراقه واستقلال القضاء المصرى الشامخ ....


و عندنا  مجلس  شعب _سيد قراره _و مجلس شورى_ قاعد فى حاله_ ومجالس محليه  واعضاء منتخبين ...واعضاء معينين... واعضاء متزورين ومطعون عليهم وعندنا جميع انواع النواب ....نواب القروض ....ونواب الكييف ...ونواب الصمت... ونواب تأشيرات الحج ونواب  تأشيرات الوزراء المضروبه... ونواب العلاج على نفقه الدوله ودول بيعملوا عمليات تجميل لأهاليهم على حساب الدوله...ونواب رقصوا فى البرلمان دا غير النواب النايمين طبعا واخيرا وليس آخرا...نواب سميحه....

وعندنا انتخابات نزيهه وانتخابات حسنيه ....ولجان ومرشحين وصناديق ودعايه ويفط واعلانات ومعارك بين المرشحين واحزاب ومستقلين و 50 % عمال وفلاحين....50% لوءات وموظفين  والباقى بيشاور عقله... واستجوابات وطلبات احاطه وموافقه ومنافقه ....وطبعا دا لأننا نعيش فى ازهى عصور الديمقراطيه .....الا اننا لم ننجح حتى اللأن فى تنفيذ اهم اهداف ثوره يوليو المجيده وهى ....حياه نيابيه سليمه
عرفت يعنى ايه دوله هيكليه؟؟؟؟


دا الكلام اللى كنت كاتبه قبل الثوره اما بعد الثوره فتأكدت من صحه النظريه .....فاذا اننا عملنا ثوره وقف لها العالم احتراما وراح لها شهداء وثوار وتسببت فى خلع مبارك وشهداء ومليونيات ومتظاهرون ونشطاء وحركات سياسيه واحزاب قديمه على جديده وفلول ومجلس عسكرى ولكن يبدو ان النظريه مازالت مستمره .....مفيش حاجه اتغيرت....مازالت الدوله هيكليه.


اخبر صديق
أضف تعليق

الإسم:
البريد الإلكترونى:    
عنوان التعليق:  
محتوى التعليق:
أدخل النص التالي: If you can't read this number refresh your screen

 
 
التعليقات 0