حركة الرقابة الشعبية الأولى
  • أخر الأخبار
  • الأكثر قراءة
  • الأكثر تعليق

 

التجاوزات اللى بره اللجنة هى :-

1.     تدخل اى جهات حكومية فى مساندة مرشح سواء عن طريق وجود اتوبيسات او سيارات تابعة لجهات حكومية تؤيد مرشح .

 

2.     وجود دعاية على ابواب اللجنة  او ميكروفونات على سيارات, وتوزيع اوراق دعاية على باب اللجنة, وممارسة اى تاثير على الناخبن, التاثير بالدعاية الدينية او توزيع اموال للمصوتين خارج اللجان .

 

3.     منع اى حد من الناخببن وله حق التصويت من دخول اللجنة سواء كان المنع من الشرطة او من الغير .

 

4.     عدم وجود تنظيم لدخول وخروج الناخبين على ابواب اللجنة.

بعد ما ترصد التجاوزات حاول توثقها سواء بالتصوير او اخذ عينه من اشكال الدعاية وبعد كدة تبلغ القاضى رئيس اللجنة جوه بده بالاضافة انك بتدون كل الملاحظات فى ورقة عشان تتواصل مع اللى بيتابعك من الجهة او المؤسسة اللى بتراقب من خلالها بعد الخروج.


 

 ايه التجاوزات اللى ممكن ارصدها جوه اللجنة يوم التصويت واعمل ايه ؟

كل مدرسة فيها عدد من اللجان اكتر من صندوق وقاضى واحد بيشرف على الصناديق وقدام كل صندوق فى موظف بينظم التصويت باللاضافة الى مناديب للمرشحين ان وجد داخل اللجنة .
والتجاوزات هى :-

5.     عدم وجود ستارة للتصويت السرى

·        بمعنى: لازم يبقى فيه ساتر, بيمنع التجسس علي إختيار الناخب

·        إزاي أكشفة: دي أسهل إنتهاك ممكن ترصده, و هو بالعين المجردة.

 

6.     مكان القاضى داخلا للجنة لا يسمح له بمراقبة جميع عمليات التصويت فى كافة الصناديق.

·        بمعنى: إن القاضي يبقى قاعد في مكان مش قادر إنه يكشف اللجنة كلها

·        إزاي أكشفة: أيضاً بالعين المجردة, لو القاضي مدي ظهرة للجنة, او واقف خارج اللجنة مثلاً

 

7.     الدخول للجنة بشكل عشوائى

·        بمعنى: فيه تزاحم والناس بتدخل بأعداد كبيرة

·        إزاي أكشفة: دة بيقتل العملية الرقابية, و لازم تبقى حازم في التنظيم عشان تعرف تشوف شغلك.

 

8.     وجود دعاية داخلا للجنة لاى مرشح

·        بمعنى: وجود بوسترات,او دعاية كلامية من الناس لبعض عن مرشح معين.

·        إزاي أكشفة: تشوف لوفية بوسترات, او أوراق بتتوزع عن مرشح معين.

9.     تاثير اى مندوب من مناديب المرشحين عل اى ناخب.

·        بمعنى: لو فيه حدماشي بيقنع الناس بمرشح واحد بعينة.

·        إزاي أكشفة: بالسمع,شوف مين مش واقف في الصف, و بيروح لناخب ناخب يتكلم معاه

 

10.  عدم وجود الحبر الفسفوري

·        بمعنى: الحبرالفوسفوري هو الضامن بإنك منتخبتش في لجنة ثانية, عشان كدة لازم يفضل موجود على صباعك لمدة 24 ساعة على الأقل.

·        إزاي أكشفة: لو الحبر بيطلع بالمأء, او الأسيتون, يبقى مغشوش, و لازم يتغير فوراً.

 

11.  ممارسة اى تاثير لاى فرد داخل اللجنة من المشرفين بتوجيهه للتصويت لمرشح من المرشحين

·        بمعنى: لو القاضي, اوأحد المندوبين التابعين لمرشح معين, او حتى الموظفين في اللجنة بيقولوا للناس ينتخبوا فين, او       مين

·        إزاي أكشفة: راقب تصرفاتهم مع كل ناخب.

 

12.  عدم فتح اللجنة للتصويت فى المعاد المحدد الثامنة صباحا ومعرفة السبب

·        بمعنى: اللجنة الإنتخابية المفروض تفتح الساعة 8 صباحاً

·        إزاي أكشفة: لواللجنة مفتحتش في المعاد المحدد, لازم تعرف ليه, و تبلغنا.

 

13.  ممارسة اى تسويد لبطاقات التصويت داخل اللجنة والتسويد.

·        بمعنى: التسويد هو املاء استمارات التصويت دون وجود مصوتين أصلاً.

·        إزاي أكشفة: في نهاية اليوم, يقوم القاضي بحصر عدد المصوتين و توافقهم مع عدد بطاقات الإنتخاب, و لوالعدد كان زايد يبقى تم تسويدهم.

 

14.  ممارسة اى تزوير لاى بطاقات تصويت داخل اللجنة بعد املائها من الناخب .

 

15.  لو مفيش حد جه ,القاضى بيعمل محضر بيثبت فيه عدد الناخبين وجه كام صوت, و بيثبت اسماء كل اللى حضروا فيه بما فيهم

·        بمعنى: لو القاضي معملش المحضر, دة ممكن يؤدي إلي إنه يحشي بطاقات مزورة.

·        إزاي أكشفة: تتأكد بإن المحضر مظبوط.

 

16.  اسماء مندوبين المرشحين وبيتم وضع المحضر فى ظرف وبيتشمع بالشمع الاحمر بالاضافة الى الصندوق بيتم قفله بالشمع الاحمر

·        بمعنى: الشمع الأحمرهو الي بيضمن بإن الصندوق ماتفتحش بعد إنتهاء الإنتخابات.

·        إزاي أكشفة: لاز متتأكد بإن الشمع الأحمر إتحط على القفل, و فتحات الصندوق.

 

17.  اكتشاف "الورقة الدوارة " والورقة الدوارة عبارة عن استمارة الانتخاب بيكون حصل عليها شخص من داخل اللجنة ولا يضعها فى الصندوق ويقوم بسرقتها و الخروج بها خارج اللجنة ثم يقوم بالتصويت فيها لصالح مرشح معين وبعد ذلك يقوم بالاتفاق مع ناخب اخر خارج اللجنة باعطائه الاستمارة والتى تم التصويت فيها لصالح مرشح عشان يدخل االناخب الجديد و ياخد استمارة فاضية ويبدلها بالقديمة ويحط الاستمارة المليانة فى الصندوق و ياخد الفاضية معاه بره اللجنة ويسلمها للسمسار اللى أعطها له عشان السمسار يتاكد انه صوت للى هوه عايزة وكمان عشان ياخد الاستمارة الفاضية ويعيد نفس الموضوع مع الناخبيين التانيين.

 

18. "الساقية الدوارة " و ده من أخطر وسائل التزيور, و هي عبارة عن أتوبيس محمل بمصوتين ,بيلفوا على اللجان الإنتخابية, و بيتم رصدها برقم الأتوبيس, و تسجيلة عندنا, عشان اللجان تاخذ بالها.

·        بمعنى: أتوبيس نقل, بيحمل ناخبين, بيلفوا على كذا لجنة, و بيصوتوا لصالح مرشحهم.

·        إزاي أكشفة: العملية الإنتخابية هي عملية فردية, الناس بتصوت مع عائلتها, او أصدقائها, او لوحدها, و أيحشد جماعي معناه إن التزوير وارد جداً, بترسل لنا رقم الأوتوبيس عشان نحظر اللجان التانية.

 

كل تلك الانتهاكات والتجاوزات انت بترصدها لو حسيت ان فى مشكلة حتحصلك لو بلغت القاضى اللى بيشرف بلغ المنسق اللى بتراقب معاه .وتحاول تبلغ اللجنة العليا للانتخابات او تروح تعمل بلاغ فى النيابة باللى حصل خاصة فى حالات تسويد البطاقات او حالات تزوير فى اوراق الانتخاب شفتها .

في كل الإنتهاكات, لازم تبلغنا على رقم 16951